មូលហេតុទូរទៅដែលធ្វើឲ្យកូនយំ

ពេលកូនយំខ្លាំងលួងមិនបាត់​ម្តងៗ អ្នកច្បាស់ជាមានអារម្មណ៍ស្ត្រេសខ្លាំងហើយមែនទេ?

តើអ្នកបានព្យាយាមគ្រប់មធ្យោបាយ និងអស់ពីលទ្ធភាព ដើម្បីលួងកូនតូចរបស់អ្នកឱ្យបាត់យំហើយមែនទេ? នេះជារឿងសាមញ្ញដែលអ្នកស្រេ្តស នៅពេលកូនយំ សូមកុំបារម្ភពេកអី។ ខាងក្រោមជាហេតុផលទូទៅទាំង ៧ ដែលធ្វើឱ្យកូនតូចយំ និងគន្លឹះខ្លះៗក្នុងការដោះស្រាយស្ថានភាពនីមួយៗ ឬអ្នកអាចនាំកូនទៅពិគ្រោះជាមួយគ្រូពេទ្យជំនាញ។​

១- ពេលកូនឃ្លាន ឬស្រេកទឹក

អាហារ និងទឹក គឺជាតម្រូវការដ៏សំខាន់សម្រាប់ទ្រទ្រង់រាងកាយរបស់កូនអ្នក កូនតូចក៏ដូចគ្នាដែរ! មូលហេតុមួយនាំឲ្យពួកគេយំ ដោយសារចង់ប្រាប់អ្នកថា "កូនឃ្លានហើយ"។ នៅពេលកូនទើបមានអាយុ ៣ខែ ក្រពះរបស់ពួកគេមានទំហំតូច គឺអាចប៉ុនទំហំផ្លែក្រូច ជាមូលហេតុកូនត្រូវការបៅញឹកញាប់បន្តិច។

មួយវិញទៀត ដោយសារអាកាសធាតុស្រុកយើងអាចនឹងក្តៅបន្តិច ហេតុនេះឲ្យកូនញ៉ាំទឹកឲ្យបានញឹកញាប់ ក៏អាចជួយបន្ថយកម្តៅ ធ្វើឲ្យកូនមានអារម្មណ៍ល្អបានដែរ។​

២- កូនឈឺ ឬចុកពោះ

អាការៈចុកពោះអាចសម្គាល់បានយ៉ាងដូចម្តេច? អាការៈចុកពោះអាចសម្គាល់បាន នៅពេលកូនយំយូរខុសពីធម្មតា អាចយំច្រើនម៉ោងរៀងរាល់ថ្ងៃ អស់រយៈពេលច្រើនសប្តាហ៍ ទោះបីមិនឃ្លាន មិនស្រេកទឹកក៏ដោយ។ ខ្យល់ ឬការបៅទឹកដោះគោលឿនពេក អាចធ្វើឲ្យកូនតូចមានអាការៈចុកពោះបាន ប៉ុន្តែគ្រូពេទ្យ ក៏មិនទាន់ច្បាស់ពីមូលហេតុចម្បង ដែលនាំឲ្យទារកឧស្សាហ៍ចុកពោះបែបនេះដែរ ដូច្នេះអាការៈនេះនៅតែមាន។

បើកូនមានអាការៈបែបនេះ ម៉ាក់ត្រូវនាំទៅជួបវេជ្ជបណ្ឌិត ដើម្បីពិនិត្យមើលថាបណ្តាលមកពីមូលហេតុអ្វីឲ្យប្រាកដ។ ជាមួយគ្នានេះដែរ អ្នកអាចសាកល្បងវិធីសាស្រ្តខាងក្រោមនេះ ដើម្បីជួយឲ្យកូនៗបាត់យំបាន៖

- ចាក់តន្ត្រីពិរោះៗឲ្យកូនស្តាប់

- អាចស្វែងរកបទចំរៀងសម្រាប់ក្មេងបាន ដែលមានខាងក្រោមនេះ៖​

​​​​- The World's Most Relaxing Baby Music

 - ​ Keep a steady rhythm!

- អាចដាក់ស្អំខ្នើយទឹកក្តៅឧណ្ហៗលើពោះកូន ព្រោះកម្តៅដែលដាក់ស្អំ អាចផ្តល់ភាពធូរស្រាលបាន។

៣- អាការៈឈឺពោះ បណ្តាលមកពីខ្យល់ក្នុងពោះ

ពេលខ្លះ ខ្យល់អាចនៅក្នុងពោះរបស់កូនដែលមិនអាចបញ្ចេញមកក្រៅដោយខ្លួនឯងបានទេ ដោយសារតែអំឡុងពេលនេះ ក្រពះពោះវៀនពួកគេ ស្ថិតក្នុងដំណាក់កាល​លូតលាស់នៅឡើយ។ កូនតូចរបស់អ្នកជាសមាជិកថ្មី ហើយក៏ថ្មីសម្រាប់ចាប់ផ្តើមញ៉ាំទឹកដោះគោ  ឯក្រពះពោះវៀនរបស់គេក៏នៅមានភាពទន់ខ្សោយដូចគ្នា​។ យ៉ាងណា អ្នកមិនចាំបាច់បារម្ភច្រើនទេ ព្រោះអាការៈខ្យល់ក្នុងពោះ គឺជារឿងធម្មតាទៅហើយសម្រាប់ទារកមានអាយុពី ០ ទៅ ៣ខែ។

អ្នកអាចព្យាយ៉ាមធ្វើយ៉ាងណាឲ្យកូនភើ បើសិនជាឃើញថា ពួកគេមិនស្រួលក្នុងពោះ ក្រោយបៅរួច។ ការម៉ាស្សាពោះកូនៗថ្នមៗ រៀងរាល់ថ្ងៃ ដោយប្រើបាតដៃក្តៅឧណ្ហៗរបស់អ្នក គឺអាចជួយបានច្រើន។

៤- ឆ្លងមេរោគក្នុងបំពង់ក

បញ្ហាកូនៗឈឺបំពង់កដោយសារឆ្លងមេរោគ (តាមរយៈមេរោគដែលមានលើដៃ ជើង និងមាត់) ឬឆ្លងតាមរយៈបាក់តេរី ដែលអាចបង្កឲ្យមានបញ្ហារលាកបំពង់ក និងធ្វើឲ្យកូនមានអារម្មណ៍មិនស្រួលក្នុងខ្លួន។ ក្នុងករណីខ្លះ មេរោគ ឬបាក់តេរីក្នុងបំពង់ក អាចបណ្តាលឲ្យកូនតូចមានអាការៈគ្រុនក្តៅខ្លួនបាន។

៥- កូនៗចាប់ផ្តើមដុះធ្មេញ

ករណីកូនៗចាប់ផ្តើមដុះធ្មេញ ក៏អាចធ្វើឲ្យពួកគេមានអារម្មណ៍មិនស្រណុកសុខស្រួល ពេលខ្លះក៏អាចធ្វើឲ្យក្តៅខ្លួនបានដូចគ្នា។ ការចាប់ផ្តើមលូតលាស់ធ្មេញលើកដំបូង អាចនឹងធ្វើឲ្យអូនៗមានអារម្មណ៍ប្លែក ព្រោះមានអ្វីម្យ៉ាងរឹង ដុះចេញពីអញ្ចាញ។ អំឡុងពេលកូនដុះធ្មេញ អាចចាប់ផ្តើមពីពួកគេមានអាយុ ៣ខែឡើង ហើយនឹងបន្តដុះរហូតដល់អាយុ ៣ឆ្នាំ។

ដើម្បជួយឲ្យកូនបន្ថយអារម្មណ៍ឈឺចាប់នៅដំណាក់កាលនេះ អ្នកអាចសាកល្បងវិធីសាស្ត្រដូចខាងក្រោម៖

- ដាក់ជែលសម្រាប់ទារកពេលដុះធ្មេញ លើអញ្ចាញ

- អនុញ្ញាតឲ្យកូនលេងជាមួយជ័រសម្រាប់ខាំលេង ឬអាចប្រើកន្សែងស្អាត និងត្រជាក់ជូតលើអញ្ចេញ

- នាំទៅជួបពេទ្យ ដើម្បីទទួលបានវិធីល្អៗផ្សេងទៀត ដែលអាចជួយកូនៗបាត់ឈឺចាប់ពេលដុះធ្មេញបាន។

ក្នុងករណីវិធីសាស្ត្រខាងលើមិនមានប្រសិទ្ធភាពទេ អ្នកអាចនាំទៅជួបពេទ្យធ្មេញពិនិត្យមើលបាន។

៦-ពេលអាកាសធាតុក្តៅ

សម្រាប់ប្រទេសដែលមានធាតុអាកាសក្តៅស្រាប់បែបនេះ បូកជាមួយនឹងបម្រែបម្រួលអាកាសធាតុទៀតនោះ គឺវាអាចប៉ះពាល់យ៉ាងខ្លាំងដល់ទារក។ បើសិនជាអាកាសធាតុ ក្តៅពេក ឬ ត្រជាក់ពេក អាចនឹងធ្វើឲ្យកូនអ្នកយំដូចគ្នា ជាសញ្ញាឲ្យដឹងថា ពួកគេកំពុងមានអារម្មណ៍មិនស្រណុក។ ពេលសីតុណ្ហភាពត្រជាក់ពេក ត្រូវបិទម៉ាស៊ីនត្រជាក់ ឬនាំទៅកន្លែងណាមានខ្យល់បរិសុទ្ធ។

អំឡុងពេលរដូវក្តៅ ម៉ាក់ ក៏អាចនាំកូនៗទៅមជ្ឈមណ្ឌលហែលទឹកសម្រាប់កុមារ ព្រោះសីតុណ្ហភាពនៅទីនោះ គឺសមរម្យ ។ អាងហែលទឹកសម្រាប់កូន ក៏មានលាយសារធាតុអំបិលក្លរីន ជួយឲ្យមានសុខភាពល្អបាន។

៧- ខ្លួនកូនៗកខ្វក់ ឬស្អិត

ទាំងមនុស្សពេញវ័យ ទាំងកូនក្មេង តែងតែមានអារម្មណ៍មិនស្រួលក្នុងខ្លួន នៅពេលដែលបែកញើសស្អុះស្អាប់ ឬខ្លួនកខ្វក់នោះ។

ករណីនេះ ម៉ាក់អាចយកកូនទៅងូតទឹក និងផ្លាស់ខោទឹកនោមចេញ។ ព្យាយាមធ្វើយ៉ាងណាឲ្យស្បែកកូនស្ងួត និងមានអនាម័យល្អគ្រប់ពេលវេលា។

បញ្ជាក់៖ រាល់ព័ត៌មានដែលវេបសាយយើងចេញផ្សាយដើម្បីចែករំលែកចំណេះដឹងប៉ុណ្ណោះ ហើយព័ត៌មានទាំងនោះ មិនអាចជំនួសដំបូន្មានពីពេទ្យជំនាញ ចំពោះស្ថានភាពសុខភាពជាក់ស្ដែងរបស់អ្នកជំងឺឡើយ។ ដូច្នេះមិនត្រូវបោះបង់ មិនស្ដាប់ដំបូន្មាន ពន្យារពេល ឬមិនទៅជួបពិគ្រោះយោបល់ជាមួយគ្រូពេទ្យ ដោយសារអ្នកបានអានព័ត៌មានណាមួយលើវេបសាយនេះឡើយ។ រាល់ពេលចាប់ផ្ដើមវិធីសាស្ត្រព្យាបាលណាមួយ ត្រូវប្រាកដថា បានពិគ្រោះ និងទទួលការអនុញ្ញាតពីគ្រូពេទ្យជំនាញ៕